كله بيضحك على كله




الأول والتانى

الأول: هاقولك حاجة قالهالى "التالت" بس اوعى تقوله إنى قولتلك إنه قالى
التانى: قول يامعلم وماتقلقشى موش هاقوله إنك قولتلى إنه قالك
الأول: هو قالى: "!!!!!!!!!!!!!!!!!"
التانى: لا ياشيخ؟؟؟؟
الأول: وكمان قالى: "!!!!!!!!!!!!"
التانى: وربنا قالك كده؟؟؟  تمااااااااام

التانى والتالت

التانى: قال إنت قلت لـ "الأول" إن "!!!!!!!!!!!!!!"
التالت: ايه ده عرفت ازاى؟؟؟
التانى: ماهو قالى إنك قلتله بس قالى ماأقولكش إنه قالى إنك قلتله
وياريت ماتقولوش إنى قولتلك إنه قالى إنك قلتله
التالت: يابن الايه ..... مع إنى وربنا قلتله هو بس وقلتله مايقولش لحد إنى قلتله وبالذات إنت

الأول والتالت

التالت: يابنى أنا موش قلتلك ماتقولش لحد إنى قلتلك وخصوصاً "التانى"
الأول: هو قالك إنى قلتله إنك قلتلى؟؟؟؟؟
مع إنى مأكد عليه مايقولش لحد إنى قلتله إنك قلتلى
بس اتطمن واللهِ أنا ماقولتش غير ليه هو بس وموش ناوى أقول لحد تانى

لحد هنا ممكن الموضوع يكون عادى
لكن اللى موش عادى هو اللى جاى ده

الأول والتاسع


الأول (بيوقع التاسع فى الكلام): قال انت قلت للـ"حادى عشر" إن "!!!!!!!!!!!!!"
التاسع: لا وربنا أنا ماقلتش غير للـ "الثامن والعشرين" بس
لكن اللى قال لـ "الحادى عشر" هو واحد من اتنين
ياإما "الخامس والثلاثين" ياإما "التاسع والأربعين"
هما دول اللى كانوا بيحكوا لبعض قدامه


وتتكرر المأساه وتوسع الدايرة وكله يخبص على كله وكله يضحك على كله
والكل يَدَّعى الأمانه فى الاحتفاظ بالسر ويطمنك ويقولك (بكل ثقة) الجملة المشهورة "ماتخافش سرك ف بيييييييير"

3 Response to كله بيضحك على كله

  1. semsem says:

    ههههههه أصلهم ميعرفوش

    الحاجة الوحيدة اللى معقولة فى البوست ده ان كله بيضحك علينا

  2. ELYSIUM says:

    صاحبك قالى صالى وقالى
    قالك ايه

    قالى وقالى
    قالك ايه كمان
    قالى وقالى

    موضوع جميل يا حبى

  3. نادر says:

    قالك ايه؟
    ومين قالك؟
    كل ده قالهولك؟
    مين معايا؟
    النمره غلط ياعماد

    إنت الأجمل دايماً ياولا :]