قوات مكافحة "الشعب"




وأنا ف ميدان التحرير يوم 6 أبريل ومستنى بِدء المظاهرة
اكتشفت شئ ماكنتش واخد بالى منه قبل كده
كنت متخيل إن اللى اسمهم "الأمن المركزى" هما اللى بيفضوا أى مظاهرة
لكن الجديد إن اسمهم دلوقتى "قوات مكافحة الشعب" أو "الشَغب" موش متأكد


* * * * *
بس ماشاء الله أول مانزلت الميدان
كأنى باحلم وربنا ...... ايشى خيال ياناس؟؟
واقفين كده زى الوحوش وماليين مراكزهم
أبص يمين ألاقى "قوات مكافحة الشعب"
أبص شمال ألاقى "قوات مكافحة الشعب"
وربنا كنت خايف أبص فوق ألاقيهم برضو
كإننا ف "حالة حرب" أو "حالة طوارئ"
نظام ايه واستعداد ايه ..... واللهِ كإنهم "كلهم ظباط"
كانوا مجتمعين على "كلب" قصدى على قلب رجل واحد
حاجة واللهِ تخلى الواحد يتطمن على أمنه وأمن البلد
لأن دلوقتى إحنا "ورانا" رجالة .... "ورانا" وحوش
بس ياترى هما "ورانا" بيحمونا ولا حاجة تانية؟؟؟؟


* * * * *
"الكلب" قصدى القلب اللى هما اجتمعوا عليه (الكبير بتاعهم) شاورلهم
مامعناه إنه اجهزوا فى مجموعة من "الشعب اللى عاوز يعمل شَغب" ظهروا دلوقتى
ف لمح البصر ........ راحت "قوات مكافحة الشعب" ناحية "الشعب اللى عاوز يعمل "شغب"
وانـ"قضوا" عليهم وعملوا معاهم أحلى واجب
- خد .. طاخ دش زو طن
- حرية .. حرية .. حرية





* * * * *
"اعتقلِت" قصدى اعتقدِت "قوات مكافحة الشعب" إنهم بالطريقة دى قدروا يمنعوا "الشعب اللى عاوز يعمل شغب" من الاستمرار فى اللى بيعمله
لكن الحقيقة إن "قوات مكافحة الشعب" مازادت "الشعب اللى عاوز يعمل شغب" إلا إيماناً وتثبيتاً
 بل ويُحسب لـ"قوات مكافحة الشعب" - بعد الهبل والعبط والإجرام والبلطجة اللى ظهروا بيهم - إنهم شجعوا "الشعب اللى موش بيعمل شغب" إنه ينضم لإخوانه فى "الشعب اللى بيعمل شغب"
وبكده أصبحت مهمة "قوات مكافحة الشعب" فى مكافحة "الشعب اللى بيعمل شغب" مختلفة بعض الشئ
لأنهم بدل ماكانوا بـ"يكافحوا" "الشعب اللى بيعمل شغب" فقط
دلوقتى بيكافحوا "كل الشعب"

5 Response to قوات مكافحة "الشعب"

  1. i-like says:

    من النهاردة مفيش حكومة

    نادر الحكومة

  2. gladiator says:

    كنت لسه هقولك اتحفنا بحاجة حلوة ,لقيت كلام جامد بس على فكرة المهم ان التاريخ مش هيفتكر اى حد من اصحاب الزى الاسود مش هيفتكر العقيد فلان او اللواء علان ويقول عليهم انهم حموا مصر من الشعب !!!! لا هيفتكر الناس اللى قاومت اما هم واسمائهم هتترمى فى مزبلة التاريخ وكفاية عليهم كده ...

  3. نادر says:

    حافظ: ههههههههههه
    Gladiator:كلام متزن وعاقل جداً
    شكراً ليك يابو حميد وسعيد بتشريفك ليا (:

  4. سمسم says:

    على رأى المثل اذا اراد الشيطان ان يسيطر على العالم فلا تتوقع انه سيجلس يوسوس لكل واحد على انفراد و لكنه هيعمل اجتماع قمة ل حكومات العالم و بعد كده هيسبهم هما يكفروا واحد واحد ---- انا لم اقل ان الرجل الخارق موجود و هو امريكى و لكنى اقول ان الرب موجود و هو !!!!!!

  5. نادر says:

    ماشى ياعم الفيلسوف وصاحب النبؤة
    وثقت الحاجات ولا لسه؟؟؟؟
    Hope u r right as i said before
    Waiting for the terrorist